आई-वडिलांचा आशीर्वाद, मेहुण्यांचे सहकार्य आणि भाईजींची साथ ठरली व्यवसायवाढीसाठी पूरक

कुठलेही काम किंवा कुठलाही व्यवसाय प्रामाणिकपणे केला तर त्यात हमखास यश मिळतेच असे सांगून सुरेश झाबक म्हणाले की, व्यवसाय चक्र दिवसेंदिवस गती धरत होतं. आयुष्य आणि व्यवसायही नवनवीन वळणं घेत होतं. हीच बाब डोळ्यापुढे ठेवून व्यवहार करीत होतो. सचोटी आणि प्रामाणिकपणा जोपासत होतो. त्यातून गुणाधारित शेती आणि शेती सामुग्रीसाठी ’ सुरेश इलेक्ट्रिकल’ हे शेतकर्‍यांसाठी भरवशाचे ठिकाण आणि दुकान ठरले. ग्राहकांची संख्या वाढली. कारण आपल्या दुकानातून कुणी रिकाम्या हाताने जाऊ नये असाच प्रयत्न होता. त्यासाठी सर्व मोठमोठ्या एजन्सी घेतल्या. आज सर्व नामांकित कंपन्यांसाठी सुरेश इलेक्ट्रिकल हे एक भरवशाचे ठिकाण झाले असून जैन, सुप्रीम, टेक्समो ,फालकन, ईगल, आशीर्वाद अशा सर्व नामवंत कंपन्यांचा अधिकृत वितरक झालो आहे असे त्यांनी अभिमानाने सांगितले. यामुळे कोरडवाहू शेतकरी आम्ही बागायतदार बनवू लागलो. शासनाच्या सर्व योजना शेतकर्‍यांपर्यंत पोहचवू लागलो. ग्राहकांचा एवढा विश्वास वाढला की, संपूर्ण व्यवसाय तालुक्यापर्यंतच मर्यादित न राहता संपूर्ण जिल्ह्यात पोहोचला असल्याचे त्यांनी अभिमानाने सांगितले.