औरंगाबाद :(दि. १ मे) महाराष्ट्र दिनाचे औचित्य साधून औरंगाबाद येथे राज ठाकरेंच्या जाहीर सभेचे आयोजन करण्यात आले होते. त्यावेळी त्यांनी शरद पवार यांच्यावर निशाणा साधला.

 

 

"शरद पवारांना हिंदू या शब्दाची मुळात एलर्जी आहे. महाराष्ट्र हा शाहू, फुले, आंबेडकरांचा आहेच, पण त्याआधी तो आमच्या शिवछत्रपतींचा आहे. शाहू, फुले, आंबेडकर हे त्यांचाच विचार घेऊन पुढे आलेली मंडळी आहेत. पण शरद पवारांच्या तोंडी छत्रपती शिवाजी महाराजांचे नाव कधी ऐकले नाही आणि त्यांच्या सभेत कधी छत्रपती शिवाजी महाराजांचा फोटोही दिसला नाही.", असे म्हणत मनसे अध्यक्ष राज ठाकरे यांनी शरद पवारांवर जोरदार टीका केली. रविवारी 

 

राज ठाकरेंनी औरंगाबादच्या सभेत पुन्हा एकदा बेकायदा भोंग्यांच्या मुद्द्यावर भाष्य केलं. यापूर्वीच्या सभेत दिलेल्या अल्टिमेटमचा विषय पुन्हा काढला, मात्र त्यावेळी अचानक अजान सुरु झाली. त्यावेळी राज ठाकरेंनी भाषण थांबवत त्यावर जोरदार प्रतिक्रिया दिली. ते म्हणाले, "माझी पोलिसांना नम्र विनंती आहे जर हे सभेच्यावेळी बांग सुरू करणार असतील तर आपण आत्ताच्या आत्ता यांच्या तोंडात बोळा कोंबावा. सरळ मार्गाने त्यांना समजत नसेल, तर मग पुढे काय होईल मला माहिती नाही. त्यामुळे संभाजीनगरच्या पोलिसांनी मी पुन्हा विनंती करतोय, हे जर या पद्धतीने वागणार असतील, तर यांना महाराष्ट्राच्या मनगटात काय ताकद आहे ही दाखवाविच लागेल."

 

 

"सध्या देशात ‘अभी नही तो कभी नही’ अशी स्थिती आहे. त्यामुळे सर्व देशवासीयांना विनंती आहे की जर यांनी ३ मेपर्यंत यांनी ऐकलं नाही, तर ४ मे रोजी प्रत्येक ठिकाणी हनुमान चालिसा ऐकू आलीच पाहिजे. वाटल्यास पोलिसांकडून रितसर परवानगी घ्या. ती परवानगी घेऊनच तुम्ही या सर्व गोष्टी जोरात करा. असे केल्यानेच इतक्या वर्षांचा प्रलंबित प्रश्नाचा कायमचा निकाल लागेल. त्यामुळे यासाठी सर्वांनी हातभार लावावा.”, असं आवाहन राज ठाकरे यांनी केलं.