पुण्यात पोटाच्याच गोळ्याचे अपहरण करून १ लाखात विकल्याची धक्कादायक घटना ; २४ तासात पोलिसांनी केला घटनेचा उलगडा
Total Views |
पुणे : शहरात स्वर्णव चव्हाण या बालकाच्या अपहरणाची घटना ताजी असतानाच शहरातील कोथरूड परिसरातून आईनेच स्वतःच्या अवघ्या चार वर्षाच्या बालकाच्या अपहरणाचा डाव रचून त्याला विकल्याची धक्कादायक घटना उघडकीस आली आहे. पैश्याच्या हव्यासापोटी आईने हे कृत्य केले आहे. या विक्री केलेल्या चार वर्षीय मुलाची पोलिसांनी सुटका केली आहे. या प्रकरणात कोथरूड पोलिसांनी अपहृत मुलाच्या आई सोबत आठ आरोपींना अटक केली आहे. पोलिसांनी या अवघ्या .२४ तासात ही सुटका केली आहे. आईनेच मुलाची एक लाख रुपयांना विक्री केल्याचे तपासात समोर आले आहे.
घटनेचे सविस्तर वृत्त असे कि,
पोलिसांनी दिलेल्या माहितीनुसार कोथरूड परिसरातून स्वतःच्या चार वर्षीय बालकाचे अपहरण झाल्याची तक्रार संबंधित आरोपी महिलेनं कोथरूड पोलिसात दिली. त्यानंतर पोलिसांनी तपास करत असताना आरोपी महिलेच्या बोलण्यात विसंगती आढळून येत होती. पोलिसांनी अधिक सखोल चौकशी केल्यानंतर घटनेचा उलगडा झाला. प्रियंका गणेश पवार असे आरोपीचे नाव आहे. आरोपी प्रियांकाला दोन मुले आहेत. तिचा नवऱ्यापासून तिचा घटस्फोट झाला आहे. पैश्याची चणचण भासल्याने स्वतःच्या एक मुलाचं अपहरण करून विकण्याचा डाव रचला. यासाठी तिने काही जणांना सोबत घेऊन 1 लाख रुपयांमध्ये लाहान मुलाची विक्री केली. पुढे दुसऱ्या पार्टीने दुसऱ्याला १ लाख ६० हजारांमध्ये रायगड जिल्ह्यात विक्री केली मात्र हा संपूर्ण कट पोलिसांनी.२४ तासात उघडकीस आणला.
पोलिसांनी आरोपी महिलेसह आठ जणांना अटक केली आहे. तपासा दरम्यान घटस्फोटानंतर मुलांना सांभाळणे शक्य नसल्याने मुलाची विक्री केल्याची माहिती आरोपीने दिली आहे. पोलीस या घटनेचा आणखी तपास करत आहेत. अपहरण झालेल्या मुलाची सुटका करून पोलिसांनी त्याला वडील गणेश पवार याच्या ताब्यात दिले आहे.